BIO

Xoán Curiel nace en Fonsagrada, na montaña de Lugo, a noite de San Xoán do ano 1975.

No ano 1998 trasládase a Santiago de Compostela, onde desenvolve a súa carreira como actor, músico e cantante. Fórmase en teatro, teatro musical e outras disciplinas escénicas en Santiago, Barcelona e Madrid, mentres vai desenvolvendo a súa carreira como compositor.

Durante 7 anos traballa en diferentes compañías teatrais como actor, cantante, músico e bailarín, ata que grava o seu primeiro disco Nai no ano 2009. Un disco que dará como resultado as súas primeiras xiras que o levarán polo extranxeiro (Brasil, Portugal, Arxentina, Italia ou Francia entre outros).

No ano 2011 presenta o seu segundo Cd Magnético Zen, co que gaña o premio a Mejor Álbum en Lengua Gallega, dentro da V Edición de los Premios de la Música Independiente.

No ano 2014 presenta o seu terceiro disco Estamos no verán!!!, un libro-disco infantil que foi tamén nomeado nos VI Premios de la Música Independiente.

No ano 2015 grava a súa voz na película galego-cubana Maimiño, coas cancións que Silvio Rodríguez crea para dito film. Neste ano tamén é nomeado na categoría de Canción de Autor nos II Premios Martín Códax da Música Galega.

No ano 2016, presenta o seu cuarto disco Ecuacións, un disco experimental gravado nos estudos da Radio Galega en Santiago de Compostela co enxeñeiro de son Toño Vazquez e tamén en Sao Paulo (Brasil) co violeiro Julio Santín. O resultado son seis temas moi líricos, con aires intimistas e bases electrónicas; un resultado musicalmente moi diferente a outros traballos anteriores.

No ano 2017 é finalista e 3º lugar nos Premios Ar(I)tmar das músicas de Galiza e Portugal. Tamén é finalista nos IV Premios Martín Códax da Música Galega na categoría Canción de Autor. Tamén é finalista nos Premios Opinión da Música de Raíz en dúas categorías (Mellor Álbum e Mellor Canción).

Xira polo norte de Italia durante dúas semanas actuando en Milan, Como e Brunate (Festival Internacional de Poesía Alda Merini, Teatro Blu de Milán, Parque do Faro de Brunate…).

Ao longo destes anos, Xoán participa en diferentes espectáculos e festivais principalmente ligados á lusofonía e á música de autor.

Espectáculos: CoraSons, A Nena e o Grilo, Cores do Atlántico, Terra da Fraternidade, Sons Miúdos, Moby Dick, A Diáspora, O Circo das Máscaras, A Noite, O Mago de Oz, Mirinda Affaire..

Festivais: Cantos na Maré, Atlantic Fest, Cantando a Marrodán, Azores Fringe Festival, Festival de Teatro de Tárrega, Andanças, Cantigas de Mayo, Festival da Luz, Noroeste Pop-Rock... Dirixe ademais festivais como Estou La e o I e II Certame de Canción de Autor/a en Galego do Concello de Teo.

Ten compartido escenario cos seguintes artistas: Carlos do Carmo, Javier Alvarez, Margareth Meneçes, Mayra Andrade, Uxía, Antonio Zambujo, Carlos Blanco, Aline Frazão, Joao Afonso, Eneida Marta, Couple Coffe, Fred Martíns, María Pujalte, Joseba Gotzon, Nico Etxart, Gontzal Mendibil, Josep Teró...

Grava coa súa voz e en algunos casos participa coas súas cancións nos seguintes discos: A Minha Embala de Aline Frazão (Angola) / From the Light de Kate Targan (California - EEUU) / CoraSons (Editorial Kalandraka - Galicia) / Trilogía de Ze Paulo Medeiros (Sao Paulo) / Son Brasilego de Sergio Tannus (Niteroi – Galicia / Galeoke (Galicia) / Arrolos de Salitre de Xabier Díaz y Guillerme Fernández (Galicia).

As súas cancións téñense traducido e cantado en lingua castelá, en portugués (de Portugal e de Brasil), en alemán e en Inglés (dos EEUU).