Xoán Curiel nace en Fonsagrada, na montaña de Lugo, a noite de San Xoán do ano 1975. No 1998 trasládase a Santiago de Compostela, onde desenvolve a súa carreira como actor, músico e cantante. Fórmase en teatro, teatro musical e outras disciplinas escénicas en Santiago, Barcelona e Madrid, namentres vai desenvolvendo a súa carreira como compositor e letrista.

Durante sete anos Xoán traballa en diferentes compañías teatrais como actor, cantante, músico e bailarín, ata que grava o seu primeiro disco Nai no ano 2008. Un disco que dará como resultado as súas primeiras xiras internacionais (Brasil, Portugal, Arxentina, Italia ou Francia entre outros).

No ano 2011 presenta o seu segundo álbum Magnético Zen, co que gaña o premio a Mejor Álbum en Lengua Gallega, dentro da V Edición de los Premios de la Música Independiente. Poucos anos despois, xunto coa Banda do Verán presenta Estamos no verán!!!, un libro-disco infantil nomeado tamén nos VI Premios de la Música Independiente.

Cara o 2015 ten a oportunidade de gravar a súa voz na película galego-cubana Maimiño, coas cancións que Silvio Rodríguez crea para dito film.

Ecuacións, o seu cuarto disco nado en 2016, trátase dun disco experimental gravado nos estudos da Radio Galega en Santiago de Compostela co enxeñeiro de son Toño Vazquez e tamén en São Paulo co violeiro Julio Santín. O resultado son seis temas moi líricos, con aires intimistas e bases electrónicas; un resultado musicalmente moi diferente a outros traballos anteriores incidindo no interese do autor en mudar de pel constantemente.

No 2018 e no 2019 presenta outros dous libro-discos infantís. A Casa do Terror, un novo traballo coa Banda do Verán que é premiado nos Premios Martin Codax (Categoría infantil) e nos Premios Frei Martin Sarmiento. Canta miña pedra, canta tamén é un libro-disco infantil nesta ocasión gravado e levado ao directo polo propio Xoán Curiel.
No 2021 presenta o seu último disco Treides comigo!, un novo xiro creativo que o leva á inmersión e á actualización de cantigas da lírica medieval galego-portuguesa e coa que é nomeado nos Premios Opinión da Música de Raíz por vez terceira e tamén por terceira vez na Categoría Canción de Autor nos Premios Martin Codax.

Nos seus vinte anos de carreira, Xoán participa en diferentes espectáculos e festivais principalmente ligados á lusofonía e á música de autor, crea o 1º e 2º Festival de Canción de Autor do Concello de Teo e participa de proxectos educativos. As súas cancións téñense traducido e cantado en lingua castelá, en portugués (de Portugal e de Brasil), en alemán e en Inglés.

Nos últimos anos Xoán desenvolve proxectos teatrais e musicais coma productor e productor artístico e realiza numerosas xiras por Italia, onde toca en espazos como o Museo Nazionale d’Arte Moderna e Contemporanea de Roma, Teatro Blu de Milán, Sala Dei Notari de Pádova, Festival Internacional de Poesía Alda Merini de Como…

Internacional

Italia – Roma (Galleria Nazionale d’Arte Moderna), Perugia (Sala Dei Notari), Cantú (Teatro S.Teodoro), Como (Festival Internacional de Poesía Alda Merini)

Francia – París Semana Cultural Galega de París, Xardíns do Trocadero

Portugal: Azores Fringe Festival – Illas Azores, Lisboa (Teatro D. María), Ciclo Portugal-Galicia: Escenarios para un Encontro, Festival Andantcas

Arxentina: Encontros culturais nos Centros Galegos de Bos Aires, Santa Fe, San Nicolás

Brasil: Co violeiro de Sao Paulo Julio Santín

EEUU. California: Santa Cruz, San Francisco e Santa Fe